بالمشرمحي… المسير والنأ


قبل الثورة كنت شارك بسوريا برحلات مسير، مشي لمسافات طويلة وتسلق جبال ونزول وديان والذي منه… كنا نمشي بخط واحد ورا التاني.

في ناس كانت تبدا المسير ببداية الخط، وتضل تحكي وهي عم تمشي أديش مبسوطة وأديش متحمسة وأديشها خبرة مشي!

شوي شوي ترجع هالناس لورا، وبعد كم ساعة تصير آخر خط المسير، ويتحول الحماس لنأ، وتضل تنئ ع التعب والعطش والجوع و”الجبل عالي” و”ما كان لازم نمشي هون” و”شو جابني معكن!؟” ومن هالنأ، يلي بخلي كل واحد من خط المسير مشتهي يندف النآء دفشة تطالعو من خط المسير… بس بالنهاية منوصل.

هدول كنا نسميهن النآئين هنن القوى السلبية بالمسير، وننصح بعضنا دائماً قبل ما نبدا إنو ما نسمعلن، ننصح بعض واحد واحد وممكن صاحب النصيحة نفسو يصير نآء، ممكن أنا صير واحد من هالنآئين والنفس بتضعف… لكن مننصح بعض قبل ما نبدا، لا تسمع للنآء ولا تخليه يأثر، هو مجرد مصدر نأ لا بقدم ولا بأخر والمسير ماشي.

بالمقابل ما بكون في بيناتنا قوى إيجابية، ما بكون في واحد يضل يحمس الشباب ويحرضهن ع المسير، لأنو داخل كل واحد فينا في القوة الإيجابية يلي شغالة وعم تحرضو يتابع المسير، وهالقوة هي السبب الحقيقي يلي خلت كل واحد فينا يشارك بالرحلة الطويلة المتعبة والمرهقة والخطرة وهو بيعرف من قبل ما تبدا أديش رح يتعب لنوصل.

وبضل كل واحد فينا ماشي وناتع على ضهرو وزن جبار بشنتا قصداً لنتدرب ع التحمّل، ونمشي ونمشي بصمت وتركيز على دواخل النفس، هيك لنوصل.

DSC05443

هلأ طوّل مسير الثورة، والنآئين تعبو، ورجعو لآخر خط المسير وعلي صوت النأ تبعهن… والنصيحة هي نفسها، لا تسمع للنآء السلبي ولو كان أنا، وتابع المسير ورح نوصل سوا.

2015-02-12 04.47.17يلي يئس وتعب وبطل شغل للثورة، ثورة الكرامة، دخيل عينو.. يسكت، يعيرنا نصوته.. يعني ينصت للناس يلي عم تشتغل ويحل عنها ويتركها تشتغل لا يحكم على شغلها بالموت لأنو بنفسو موت.

يلي لسا عم يشتغلوا للثورة جوات سوريا كتار، كتار كتير أكتر مني ومنك، وما متأملين منك مديح بس متأملين يحققو شي بشغلهن، ويلي عم يتعب ويشتغل ما بدو منك إلا إنك تبطل نكران لشغله وتحكي بالمنيح أو تسكت، الله كافيهن شبيحة الأسد وداعش وكل شياطين الكون، مو ناقصهن النأ تبعك كمان.

يعني بالمشرمحي، يلي ما عم يشتغل لا يقول ما حدا عم يشتغل، يقول بالحرف أنا ما عم اشتغل وما بعرف غيري شو عم يشتغل.

|— مؤنس بخاري -|

hiking

اترك تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s