إلى المثقف العربي القومي اليساري


رشا عمران

رشا عمران

قرأت اليوم في “كلنا شركاء” رسالة من الشاعرة رشا عمران وجهتها إلى المثقف العربي القومي المدافع عن بشار الأسد، حقيقة الرسالة عبرت عن أغلب ما اختلج في نفسي طيلة الأشهر الثلاثين الماضية من عمر ثورتنا ثورة الكرامة السورية المستباحة من أعداءها… أحببت الرسالة فأحببت أن أنقلها لكم هنا في مدونتي، وهي بالعامية السورية، ما يعطيها النكهة السورية الحقيقية:

أيوالله يا أخي العربي القومي… نحن السوريين هيك ،خاينين بطبعنا وما منعرف شو هي الوطنية ، عنا رئيس بينشرب مع المي العكرة بس نحن هيك بدنا الغرب وأميركا يضربونا ، اول ما بلشنا بقتل الحريري ، قتلناه نحن الشعب السوري الخاين واتهمنا الرئيس المناضل تبعنا بلكي الاستعمار بيفوت على سوريا وبيضرب البنية التحتية والفوقية تبعنا مامشي الحال.

بعدين قررنا نقلد الشعوب العربية الوطنية يلي عملت ثورات على انظمتها العميلة قمنا بلشنا بدرعا وخلينا شوية اولاد يكتبو كم كلمة واعتقلناهون وقبعنا اضافرهن وقتلنا كم واحد منهن وما فات الاستعمار واحتلنا بعدين كبرنا المظاهرات وصرنا نضرب حالنا بالرصاص ونعتقل حالنا ونعذب حالنا بالمعتقلات ونموت تحت التعذيب ومافات الاستعمار احتلنا ،بعدين فكرنا انو ممكن اذا اقتحمنا مدنا وضيعنا بالدبابات وعملنا مجازر بحالنا ونهبنا بيوتنا بيفوت الاستعمار بيحتلنا كمان ما فات ،

قلنا مافي غير الطيارات نقصف منها حالنا ونهدم بيوتنا ونتشرد ونلجأ متل ما بيلجؤوا خلق الله الخونة كلهن كمان ما مشي الحال مافات الاستعمار ضربنا واحتلنا ، قلنا لأ بقا ماضل غير السكود ، نضرب حالنا بالسكود ويموت منا كتير كتير مشان القصة تكبر ويفوت الاستعمار الغربي ويحتلنا كمان ما التكش فينا الله وكيلك ،قلنا طيب بلكي إذا فتحنا حدودنا بيفوتوا عناصر القاعدة التكفيرين عالبلد وبيعملولنا أفغانستان عنا (لان متل ما بتعرف أخي القومي العربي نحن السوريين كلنا اصلا مياليين للقاعدة) بلكي هيك بيحس الغرب الاستعماري على حالو وبيفوت بيحتلنا كمان ما مشي الحال.

قلنا معناتها ما ضل عنا غير الكيماوي نشرب كل يوم الصبح على الريق كاسة كيماوي ووحدة تانية قبل النوم ومنموت دغري نحن وولادنا ، مو تاري طلع الكيماوي هو الخط الأحمر يلي حاطو الغرب الاستعماري النا وممنوع نستخدمو على حالنا ، والله يا حبيب ظبطت أخيرا وقرر الغرب الاستعماري بعد الكيماوي يلي قتلنا فيه حالنا نحن الشعب السوري الخاين انو يحتلنا او يضرب بنيتنا التحتية والفوقية…

ونسيتك بشغلة اخي العربي القومي الواعي المثقف: كل هالوقت الماضي ورئيسنا يلي بينشرب مع المي العكرة عم يتعامل معنا كأولادو تماما وكل ما خربنا شغلة بيكون دغري سامحنا و ظبطها قبل ما الغرب الاستعماري ينتبه خصوصا لما بلشنا نخرب اللحمة الوطنية ..ولك لأ مو اللَحمة ..مو لحمة الغنم ,, اللحمة الوطنية ،من التلاحم ,, رئيسنا الحباب بيموت باللحمة الوطنية كان كل يوم يقعد يجمع يلي نحنا عم نفرفطوا من هاللحمة الوطنية وينسج منو المجتمع السوري متل ما بيحلم فيه هو بس نحن كنا مصرين نخرب احلامو لرئيسنا الحباب يلي بينشرب مع المي العكرة لان مقررين انو بدنا الغرب الاستعماري يضربنا ويحتلنا نحن الشعب السوري الخاين العميل التكفيري الجهادي : عرفت كيف أخي العربي القومي اليساري المثقف!

اترك تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s